2005年11月20日寫 序於紀福讚《各各他ê目屎—苦難得安慰》
紀福讚牧師佇美國監獄服刑期間，不斷以台語寫作來充實伊的獄中生活。過去幾年來，我陸續接著伊寄予我的文稿。佇chiah的作品中，除了以台語表達的特質外，文章內容包含對台灣鄉土的關懷，信仰真諦的探索，以及對人性善、惡kún-kà 的沈思。相信chiah-的文字對伊佇獄中的日子，一定是對內心發出，有深刻的內在意義。
人毋是聖，佇落難中ē-tàng khîⁿ-tiâu信仰，保持向望，這是基督教信仰予人的特權，也是難得的福份。當然，真實的向望必須是對四周圍環境的和解佮饒恕。生命的悔改佮新生需要真濟人共同付出愛心的代價。我相信chiah-的文字的背後新生命的種子。 對作者本身、對讀者，甚至對四周遭bat受著傷害的人傳達謙卑、悔改、饒恕佮合好的信息。因為佇各各他受釘的主耶穌留予咱的教示佮典範。因為「基督親身kā咱的罪帶到十字架頂，予咱無閣生活佇罪中，kan-taⁿ為著公義來活。因為伊所受的，恁得著醫治。」（彼前2:24）
經過chiah-nih 濟（多）年，日前接著豐惠姐的批，kā我講beh將紀牧師的文章聚集成冊，而且ài我替冊的出版寫序。我真心向望這本冊的出版，ē-tàng帶來改變佮換新，生出向望佮新生。
